БИШКЕК, 19-июн. — Sputnik. Кыргызстанда райондор аралык сотторду жоюп, алардын функциясын райондук сотторго өткөрүп берүү пландалып жаткандыгын өлкө башчынын маалымат кызматынан билдиришти.
17-майдагы Соттук реформа кеңешинин чечимине ылайык эки эксперттик жумушчу топ түзүлдү. Алар бул жааттагы процедураларды жөнөкөйлөтүүгө шарт түзгөн мыйзам долбоорлорун иштеп чыкмакчы.
Ошондой эле аталган топтор кылмыш жасаган адамдардын келтирген зыяндын ордун толтуруусунун механизмдерин жазык жоопкерчилигине тартуунун эскирүү мөөнөтүнүн өтүшүн эске алуу менен иштеп чыгуусу зарыл.
Бул эксперттик жумушчу топ президенттин аппарат жетекчисинин биринчи орун басарынын буйругу менен түзүлдү.
Эксперттик жумушчу топтордун курамына КРдин аткаруу, сот бийлик бутактарынын, көзөмөлдөө жана укук коргоо органдарынын жана эксперттик коомчулуктун өкүлдөрү киргизилди.
Аталган эксперттик жумушчу топтордун жыйындарын чукул арада өткөрүү болжолдонууда.
