БИШКЕК, 27-апр. — Sputnik. Вице-премьер Замирбек Аскаров Бишкектеги "Ош базары" соода комплексинин өрттөн жабыркаган ишкерлери менен жолугушууга барды. Бул тууралуу өкмөттүн маалымат кызматы билдирди.
Өз кезегинде Аскаров өкмөт "Сейтек" ЖЧК, "Берекет" ЖАК жетекчилигине жабыркаган имараттарды жана соода аянттарын тезинен калыбына келтирүү сунуштамасын бергенин айтты.
"Алгач биз жабыркаган имараттарды жана аянттарды тийиштүү экспертизадан өткөрүүбүз керек. 10-майга чейин бизге тийиштүү маалыматтар берилет. Учурда ишкерлерден документтерди жана арыздарды кабыл алуу боюнча штаб иш алып барууда, ал жакка сиздер да кайрылсаңыздар болот", — деди ал.
Вице-премьер ошондой эле финансы-кредиттик уюмдар менен жабыркаган ишкер субъектилеринин кредиттик карыздарын реструктуризациялоо боюнча иштер жүрүп жатканын маалымдады.
"Ош" базары соода-комплексинде жыл башынан бери үч жолу өрт чыккан. Биринчи кырсык 30-январда болсо, экинчиси 5-мартта жана үчүнчүсү 13-апрелде катталган.
