БИШКЕК, 25-дек. — Sputnik. "Ала-Тоо 24" жаңылыктар каналынын диктору Канат Авазбеков жаңы жылдык кечеде фашисттик форманы интермедия үчүн гана кийгендигин КТРКнын башкы директору Илим Карыпбеков билдирди.
Эске салсак, аталган каналдын журналисттери өздөрүнүн социалдык тармактагы баракчаларына кайсы бир кечеден түшкөн сүрөттөрүн жүктөгөн. Алардын арасында Авазбековдун фашисттик форма кийип турганын көрүүгө болот. Мындан улам коомчулукта аны сынга алгандар чыккан.
"Бул "Ала-Тоо 24" каналынын кызматкерлеринин жаңы жылдык кечеси болчу. Канатты интермедияда терс каарман, фашисттик офицердин ролун аткарып бер деп суранышканда, ал макул болгон. Журналист бул форманы интермедия учурунда гана кийген. Ошол маалда кесиптештери аны менен сүрөткө түшкөн", — деди Карыпбеков.
Ошондой эле башкы директор бул жөн гана роль экенин айтып, кечиримдүү болууга чакырды.
Мындан тышкары, ал Канат Авазбеков жана КРТКнын башка журналисттери тарыхты жакшы билерин, ата-бабалар жеңишке кандай азап менен жеткенин унута элегин кошумчалады.
