15-октябрь күнү Кыргызстанда президенттик шайлоо өттү. Өлкө боюнча 2375 шайлоо участогу эртең мененки саат 8.00дө ачылып 20.00дө жабылды. Борбордук шайлоо комиссиясынын берген маалыматы боюнча шайлоодо 1 миллион 692 миң 423 киши добуш берди. Бул жалпы шайлоочулардын 55,93 пайызын түзөт. Ал эми алдын ала маалымат боюнча алдыда Сооронбай Жээнбеков келе жатат. Экинчи орунда Өмүрбек Бабанов, үчүнчү сапты Адахан Мадумаров ээледи.
