БИШКЕК, 4-сен. — Sputnik. Баткен облусуна караштуу Кадамжай районунун Орозбеков айылында "Баластан Охна" аттуу балдар бакчасы ачылды. Бул тууралуу Sputnik Кыргызстан агенттигине аталган балдар бакчасынын жетекчиси Гүлбара Нажиева билдирди.
Анын айтымында, бакчанын ачылыш аземине Жогорку Кеңештин депутаттары жана жергиликтүү бийлик өкүлдөрү катышкан.
"Буга чейин биздин айылда бир да бала бакча жок эле. Кийин мен айылдык кеңешке депутат болуп келгенде "айылга эң алгач бала бакча ачам" деп максат койгом. Буюрса максаттар ишке ашып эски мектепти оңдоп-түзөп 130 орундуу бакча салдырып алдык. Учурда бул жакта 4 тайпада 130 бала тарбияланууда. Эски мектепти оңдоп, жаңы бакча ачууга мамлекет тарабынан 3 миллион сом бөлүнгөн. Баса белгилеп кетчү нерсе бакчанын ачылышына айыл тургундарынын да салымы чоң", — деди Нажиева.
Ошондой эле аталган айылга "Жаңылануу" коомдук фонду тарабынан заман талабына ылайык футбол аянтчасы курулуп, Кадамжай районундагы мамлекеттик ишканалардын ортосунда футбол боюнча мелдеш өткөрүлгөн.
