БИШКЕК, 1-сен. — Sputnik. Белгилүү ырчы Элмира Кайып кызынын сөөгү эртең, 2-сентябрда, жерге берилет. Бул тууралуу Sputnik Кыргызстан агенттигине айылдаш иниси Бердибек Жамгырчиев маалымдады.
Анан айтымына караганда, ырчы менен коштошуу зыйнаты саат 10.00дө башталып, сөөгү "Ала-Тоо 2" конушунун Камыр-Ата көчөсүндөгү инисинин үйүнөн чыгат.
Жамгырчиев буга чейин ырчынын сөөгү туулуп-өскөн Жети-Өгүз районунун Ак-Терек айылында жерге берилет деп туура эмес маалымат тарап кеткенин белгилейт.
Такталган маалымат боюнча Элмира Кайып кызы жүрөк оорусунан улам каза болгон.
Ал Токтогул Сатылганов атындагы филармониянын алдындагы эки жылдык студияны жана Бүбүсара Бейшеналиева атындагы искусство институтун бүтүргөн. Чыгармачылык жолунда "Ак куулар сени сагынар", "Калды эсимде", "Булбулум" аттуу чыгармаларды аткарып элге таанымал болгон.
