БИШКЕК, 22-авг. — Sputnik. Кыргызстандын жарандары 30-сентябрга чейин биометрикалык маалыматтарын тапшырып, шайлоого катыша алат. Бул тууралуу Борбордук шайлоо комиссиясы кабарлады.
Билдирүүгө ылайык, буга чейин биометрикалык маалыматтарын тапшырбаган шайлоочулар жергиликтүү өзүн-өзү башкаруу органдары менен калкты тейлөө борборлорунан каттоодон өтө алат.
Андан сырткары, эгер жаран каттоодо турган шаардан же айылдан башка жерде жайгашкан шайлоо участогунда добуш бергиси келсе, 30-сентябрга чейин шайлоо участогунун комиссиясына кайрыла алат.
Мамлекеттик каттоо кызматынын маалыматы боюнча, август айынын башында өлкө боюнча 18 жашка чыккан жана биометрикалык маалыматтарын тапшыргандардын саны 2 миллион 914 миң 588ге жетти.
