БИШКЕК, 29-июн. — Sputnik. Кечээ унаа сүзүп кетип каза болгон милиция кызматкеринин артында төрт баласы калды. Бул тууралуу Sputnik Кыргызстан агенттигине ИИМдин маалымат кызматынан билдиришти.
Эске салсак, 28-июнда Чолпон-Атада Кайгуул милиция кызматкерин саат 16.35тер чамасында унаа койдуруп кетип, ал эсине келбеген бойдон ооруканадан каза болгон.
"Ысык-Көл ИИБдин Кайгуул милициясынын кызматкери Нурмат Медеров Григорьевка айылында 1981-жылдын 11-августунда туулган. Аскерде кызмат өтөп, 2012-жылы Жусуп Баласагын атындагы КУУну аяктаган. Органда 2008-жылдан бери кызмат кылган", — деп айтылат билдирүүдө.
Маалыматка караганда, маркумдун артында төрт баласы калды. Балдарынын улуусу 11 жашта болсо, андан кийин сегиз жаштагы эгиз кыздары жана эки жаштагы уулу бар.
Маркумдун сөөгүн 30-июнь күнү жерге берилет.
