БИШКЕК, 4-май. — Sputnik. Президент Алмазбек Атамбаев Коопсуздук кеңешине жол кырсыктарын азайтууга чара көрүп, жарандардын коопсуздугун сактоо тапшырмасын берди. Бул тууралуу мамлекет башчынын маалымат кызматынан кабарлашты.
Билдирмеге караганда, Коопсуздук кеңешинин катчысы Темир Жумакадыров бүгүн президенттин кабылдоосунда болуп, улуттук коопсуздуктун абалы жана коррупцияны жоюу чаралары тууралуу маалымат берген.
"Президент аталган маселелерден сырткары, жол кырсыктарын азайтуу максатында мамлекеттик органдар менен биргеликте чара көрүү тапшырмасын берди", — деп айтылат билдирүүдө.
Белгилей кетсек, ички иштер министри Улан Исраилов 2017-жылдын үч айында эле 1169 жол кырсыгы катталып, анын айынан 148 жаран курман болуп, дагы 1686 адам түрдүү жаракаттарды алганын президентке маалымдаган.
