БИШКЕК, 29-мар. — Sputnik. Айрым шаар тургундары түштөн кийин Бишкекте ири жер титирөө болору тууралуу маалыматтарды активдүү бөлүшүп жатканын окурман Sputnik Кыргызстан агенттигине билдирди.
Анын айтымында, шаардыктар бир-бирине чалышып, бүгүн, 29-мартта Бишкекте ири жер титирөө болот деп эскертишүүдө.
"Тараган маалымат боюнча саат 14:00дө жер титирөө болмок. Мага кызым айтты, кызыма эжем айтыптыр, эжем дагы кимдир бирөөлөрдөн угуптур. Коопсуздук үчүн үйдөн чыккыла деп жатышат. Бул канчалык чындыкка коошот?" — деп окурман суроо менен кайрылды.
"Акылга сыйбаган имиш кеп. Мындай айың-кептер кээде тарап кетет. Ошентсе да жер титирөө качан кайсы жерде болорун эч ким алдын ала айта албайт", — деди Абдрахматов.
Ал ошондой эле быйыл ири жер титирөө болору тууралуу Сейсмология институтунда маалыматтар жок экенин кошумчалады.
Эмне үчүн жер титирөөлөр болорун Sputnik Кыргызстан инфографикасынан көрүңүздөр>>
