БИШКЕК, 2-дек. — Sputnik. Кыргызстан туристтерди өлкөгө кызыктыруу максатында заманбап технологияларды жана жаңы идеяларды ойлоп таба баштады. Бул тууралуу "KG Labs" коомдук уюмунун түзүүчүсү Азиз Солтобаев Sputnik Кыргызстан маалымат борборунда өткөн жыйында билдирди.
Анын айтымында, туризмди өнүктүрүү идеялары (хакатон) командалык жумуштун жыйынтыгында аныкталат. Хакатон бүгүн башталып эки күнгө созулат. Эки күндүн ичинде туризмди өнүктүрө турган 20 мыкты долбоор тандалып алынып, жеке инвесторлор тарабынан 100 миң долларга чейин каржыланат.
"Дүйнөдө туризм тармагы бат өнүгө баштады. 50 жылдын ичинде туристтердин саны миллиардга өстү. Мындан улам көпчүлүк турист бара турган өлкөсү жана андагы тейлөө тууралуу кенен маалымат алгысы келет. Саякаттоого бара турган өлкө тууралуу билүү максатында турист дароо эле Интернетке кирип издей баштайт. Ал эми хакатон туризмди өнүктүрөм деген жаштар үчүн идеясын ишке ашырууга чоң мүмкүнчүлүк түзүп берет", — деди Солтобаев.
Хакатон — веб-сайт, мобилдик тиркеме сыяктуу инновациялык идеяларды иштеп чыгаруучулардын форуму.
