БИШКЕК, 24-ноя. — Sputnik. "Ата Мекен" фракциясынын лидери Өмүрбек Текебаев Биринчи Май РИИБи тарабынан суракка чакырылганын жалпыга маалымдоо каражаттарынан уккан. Бул тууралуу аталган фракциянын катчылыгы билдирди.
Эскерте кетсек, 14-ноябрда Текебаевдин Бишкек шаарынын Баетов көчөсүндөгү батирине ууру киргени тууралуу кабарланган. Маалыматты эл өкүлүнүн жубайы билдирген. Окуя болгон жерге келген милиция кызматкерлерине ал үй ичинен бекитилгенинен улам ичине кире албай жатканын айткан.
Буга чейин Бишкек ШИИБ бул боюнча кылмыш иши козголгонун, бирок жабырлануучулар суракка келбей жатканын маалымдаган.
Фракция катчылыгы Текебаев суракка расмий чакырылбаганын белгилейт.
