БИШКЕК, 21-сен. — Sputnik. Ак үйдүн алдына митингге чыккандар өкмөттүн жерди колдонуу боюнча демилгелеп жаткан мыйзам долбооруна каршы болууда. Өзүн Елена Коршунова деп тааныштырган жаран өкмөт демилгелеп жаткан мыйзам долбоору элге каршы келерин айтат.
"Өкмөт сунуштап жаткан мыйзам долбоорунда көп кабаттуу үйлөрдүн алдындагы бакчалардын кереги жок деген маанидеги пункттар бар экен. Алардын кантип кереги жок болсун?! Бул шаардын борборундагы коммуникация коюлган жерлерди басып алууга болгон аракет да. Биздин чек арада толтура талаштуу жерлер бар. Мына ошолорду карап, ошол жерлерди чечишсин", — дейт митингге келген Коршунова.
Митингчилердин айтымында, өкмөт демилгелеген мыйзам долбоорду буга чейин депутаттар экинчи окууда жактырышкан. Ал бүгүн күндүн экинчи жарымында депутаттар дал ушул мыйзам долбоорун карай тургандыгын айтты.
"Биз, катардагы жарандар, депутаттардан элге каршы келген мыйзамдарды кабыл албоону сунуштайбыз. Бир нерсе кабыл аларда жети өлчөп бир кесүү керек", — дейт ал.
Коршунова буга чейин депутат Өмүрбек Текебаев дагы Бишкек шаарынын чок ортосуна байланышкан мыйзам долбоорун демилгелеп, кийин аны кайта чакырып алганын кошумчалады.
Ал ошондой эле эми депутаттар да өкмөттүн элге каршы болгон мыйзам долбоорун жокко чыгарууну суранарын баса белгиледи.
