БИШКЕК, 21-сен. — Sputnik. Жалал-Абаддын Базар-Коргон районунда кыз-келиндерге экстремизмдин алдын алуу боюнча сабактар өткөрүлгөнүн муфтият билдирди.
Маалыматка ылайык, окутуу медреседе райондун имамы Тынчтык ажы Шаиков тарабынан жүргүзүлгөн.
"Иш-чаранын жүрүшүндө Сирияда болуп жаткан туура эмес көрүнүштөр, агымдар, ал жакка кеткендердин абалдары айтылды. Ошондой эле Сирияга баруу туура эмес экендиги Куран аяттарынан жана Пайгамбарыбыздын (САВ) хадистери менен далил келтирилди", — деп айтылат маалыматта.
Мындан сырткары, окуп жаткандарга аялдын орду, илимдүүлөрдүн даражасы, ислам дини, терс диний агымдар туурасында түшүнүктөр айтылды.
