Калпакты кыргыздар гана тигиши керекпи? Импортко тыюу салган мыйзам долбоору

Жазылуу
Мыйзам долбоорго караганда чет элден сапатсыз тигилген калпактар баш кийимдин баркын кетирип жатат.

БИШКЕК, 13-сен. — Sputnik. Жогорку Кеңештин депутаты Тазабек Икрамов калпакты башка мамлекеттерден импорттоого тыюу салуу боюнча мыйзам долбоорун жазып, аны коомдук талкууга алып чыкты. 

Андагы маалыматка караганда долбоордун негизги максаты кыргыз элинин улуттук салтына колдоо көрсөтүү жана улуттук маданият үчүн сыймыктануу сезимдерин өркүндөтүү болуп саналат. 

"XIX кылымда калпактарды тигүү аялдардын иши, ал эми аларды сатуу эркектерге тиешелүү болгон. Калпакты төмөндү көздөй кеткен төрт кыйык кылып тигишкен. Кыйыктын капталдары тигилген эмес, бул тийген күндөн көздү коргоп, калпактын четтерин өйдө көтөрүүгө же төмөн түшүрүп кийип жүрүүгө ыңгайлуу болгон. Калпактын үстүн өзүнчө сабак менен кооздошкон”, — деп айтылат негиздеме катта. 

Ошондой эле кыргыз калпактары ар кандай түрдөгү кездемелер менен кооздолуп, атактуу адамдардын калпактарынын төбөсү бийик, четтери кара баркыт менен кошуп тигилгени белгиленет. 

"Акыркы мезгилдерде айрым адамдар калпакты мончого кийип алышкан бир катар терс учурлар байкалат. Бул алардын улуттук баш кийимди урматтабаганын билдирет. Ал эми ишкер адамдар сапатсыз синтетикалык материалдардан тигилген даяр калпактарды коңшу өлкөлөрдөн алып келип жатышат, демек бул чет өлкөлүк меймандар тарабынан чыныгы ак калпак тууралуу түшүнүгүнө тескери таасирин тийгизбей койбойт”, — деп убайым тартат депутат. 

Мына ушул себептерден улам калпактын баалуулугун көтөрүү зарылдыгы жаралып, башка мамлекеттерден импорттоого тыюу сунушу келип чыкканы белгиленет.

Жаңылыктар түрмөгү
0