Байланыш комитети: Үңкүр-Тоодо телеберүү менен Интернет үзгүлтүксүз иштөөдө

БИШКЕК, 26-авг. — Sputnik. Үңкүр-Тоодогу "Кербен" станциясында телефондук жана уюлдук байланыш, Интернет, мамлекеттик каналдар өз тартибинде иштеп жатат. Бул тууралуу Байланыш жана маалымат технологиялары боюнча мамлекеттик комитет билдирди.

Апта башында чек аранын такталбаган жерине Өзбекстандын жети милиция кызматкери тик учак менен келип конгон. Кыргызстандын жараны болгон телемунаранын төрт кызматкери кармалып, Өзбекстандын Жаңы-Коргон РИИБине алып келинген. Кыргызстан коңшу өлкөдөн мындай кадамдын себебин түшүндүрүүнү жана кармалгандарды бошотууну талап кылган.

Бейшемби күнү КРдин аталган мамлекеттик комитети уюлдук операторлор менен жолугушуу өткөрдү. Мекеме электр энергиясы өчүрүлгөн маалга автоматтык түрдө иштей баштоочу дизель генераторлору сыяктуу резервдик система каралганын маалымдады. Мындан улам "Кербенде" күтүүсүз кырдаалда пайдаланылуучу резервдик система пайдаланылып, ал телефондук жана уюлдук байланыш, Интернет жана мамлекеттик телерадиоканалдардын тынымсыз иштөөсүн камсыздайт.