БИШКЕК, 16-авг. — Sputnik. Бүгүнтөн тарта Боом капчыгайындагы жолду тоо боорундагы таштарды кулатып түшүрүү максатында жаап башташты. Бул туурасында Транспорт жана жолдор министрлигинен кабарлашты.
Буга чейин аталган ведомстводон 16-25 август ичинде Бишкек — Нарын — Торугарт жолунун 131-чакырымы 9.00дөн 15.00гө чейин жабыларын кабарлашкан.
Автоунаалар таш түшүргөн жерлерде гана токтотулат. Тазалоо иштери учурунда ары-бери каттагандар бир тилке менен жүрөт.
Акыркы мезгилде аталган капчыгайда таш кулаган учурлар көп кездешүүдө. Акыркы ирет мындай кырсыкка 11 адам түшүп келе жаткан автобус кабылып, бир адам каза тапкан.
