БИШКЕК, 7-июл. — Sputnik. Кыргызстандык алты окуучу Гонконгдо өтүп жаткан математика боюнча 57-эл аралык олимпиадага катышып жатат. Бул тууралуу Билим берүү министрлигинин маалымат кызматы билдирди.
Билим таймашы 6-16-июль аралыгында өтүп, анда дүйнө жүзүнөн келген 100 курама топ катышып жатат.
Кыргызстандын курама тобунун атынан Саадинур Азисбек уулу, Дослан Жекшеев, Бекжол Жолдубай уулу, Абдыганы Исаев, Илларион Абдыкаимов жана Жылдыз Камбаралиева ат салышууда.
Математика боюнча эл аралык олимпиада 1959-жылдан тарта жыл сайын өткөрүлүп келет. Ар бир мамлекеттин намысын курамы алты окуучудан ашпаган топ коргойт.
