Стамбулда террордук топтун мүчөсү деп шектелген кишиден КР паспорту чыкты

БИШКЕК, 4-июл. — Sputnik. Украинадан Стамбулдагы "Ататүрк" аэропортуна учуп келген эки киши шектүү катары Түркиянын полициясы тарабынан текшерүүгө алынганын Hürriyet гезити жазып чыкты.

Маалыматка ылайык, Стамбулдун Коопсуздук башкармалыгынын Терроризмге каршы күрөшүү бөлүмүнүн кызматкерлери шектүүлөр Россия менен Кыргызстандын паспортторун алып жүргөн кишилер экенин аныктаган.

"Полиция 25 жаштагы жарандын Россиянын паспорту жана 35 жаштагы жарандын Кыргызстандын паспорту болгонун аныктады. Экинчи кишинин Украинада жашаганга уруксаты болгон", — деп жазат аталган басылма.

Алардын баштыктарын тинтүү учурунда температура менен көрүүчү 4 дүрбү, аскерий 3 камуфляж, башка жарандарга таандык эки паспорт, Кыргызстанга таандык 3 ID-карта жана туулгандыгы тууралуу 5 күбөлүк алынган. Түрк полициясы кармалгандарды "Ислам мамлекети" террордук тобунун мүчөлөрү деген шек менен көзөмөлгө алган.

Белгилей кетсек, Стамбулдун "Ататүрк" аэропортундагы жарылуудан кырктан ашык киши каза болуп, жүздөгөн кишилер түрдүү жаракаттарды алышкан.

Кыргызстандын Тышкы иштер министрлиги шектелип кармалган киши КРдин жараны болуп болбогонун тактап жатканын билдирди.

КР жарандары террорист деп аталган беш учурду Sputnik Кыргызстандын төмөнкү топтомунан окуңуз>>