Атамбаев: Кыргызстан чачырап жок болот дегендер болгон, бирок биз туруштук бердик!

Жазылуу
Өлкө башчы арадан алты жыл өтсө да азыркыга чейин курман болгондор менен дайынсыз кеткендерди жоктолуп келе жатканын, андан бери Кыргызстан бир топ ийгиликтерге жетишкенин белгиледи.

БИШКЕК, 10-июн. — Sputnik. Мамлекетибизди чачырап жоголот, гуманитардык капсалаңга дуушар болот деген көсөмдөр көп болгон. Биз тетирисинче кыйраган үйлөрдү, ишканалар менен мекемелерди калыбына келтирдик, адамдар арасында ондогон жылдар бою өкүм сүрүп келаткан ажырымды токтотуп, бири-бирине ишенимди кайтарууга өбөлгө болгудай система түздүк. Мындай сөздү президент Алмазбек Атамбаев июнь окуяларынын алты жылдыгына байланыштуу жасаган кайрылуусунда айтты.

Эскерте кетсек, 2010-жылдын 10-июнунда Ошто улут аралык араздашуу чыгып, андан 442 кыргызстандык жаран каза болгон.

Атамбаев арадан алты жыл өтсө да азыркыга чейин курман болгондор менен дайынсыз кеткендерди жоктолуп келе жатканын, андан бери Кыргызстан бир топ ийгиликтерге жетишкенин белгиледи.

"Кыргызстанда элдин биримдигин жана этностор аралык мамилелерди чыӊдоо Концепциясын иштеп чыгып, жүзөгө ашырууга кириштик. Бүгүн анын негизги багыттары боюнча бекем пайдубал түзүлдү деп ишенимдүү айта алабыз. Биринчи эки этапта каралган иш-чаралардын көбү аткарылды. Этностор аралык чөйрөдөгү саясатка жоопкер мамлекеттик агенттик түзүлүп, жер-жерлерде аны жүргүзүү системасы жаралды. Кадр саясатында да оң жылыштар байкалууда", — деди өлкө башчы. 

Президент өлкөбүзгө, тарыхыбызга, маданиятыбыз менен мамлекеттик тилибизге урмат мамиле жасоо, Мекенди сүйүү биринчи турушу керек деп эсептейт. Ушул нерсе гана бириктирүүчү күч болуп, кыргыздар менен башка этнос өкүлдөрүнүн ортосундагы мамилелердин шайкештигин камсыз кылат. 

"Этностук тегине карабастан, көптөгөн мекендештерибиз өздөрүн кыргыз жараны катары сезе баштаганы биз туура жолдо баратканыбызды көрсөтөт. Кыргызстан түштүгүндө өзбек мекендештерибиздин мамлекеттик тилде улам көбүрөөк сүйлөй баштаганын эл биримдигине карай жолдогу зор жетишкендигибиз катары баалайбыз. Ондогон жылдардан кийин биринчи жолу Ошто кыргыз тили басымдуулук кыла баштады, өзбек жарандарыбыз кысынбай кыргызча сүйлөп жатат. Мына ушунун өзү эле этностор арасындагы маанайды жакшыртып отурат", — деди Атамбаев.

Өлкө башчы этностор аралык чөйрө өтө аялуу экенин эскертип, Кыргызстандын ар бир жараны өз үйүндө, көчөсүндө, айылында жана шаарында тынчтык үчүн жоопкер экенин сезүүгө тийиш деп айтты. 

Кайрылуунун соңунда президент Кыргызстан элине ынтымак, биримдик каалады.

Жаңылыктар түрмөгү
0