21:04 24 Тогуздун айы 2021
Түз эфир
  • USD84.7875
  • EUR98.7011
  • RUB1.1965
Коом
Кыскача шилтеме алуу
56350

Мектеп бүтүрүүчүлөрүнүн жакшы иштеринин бул сапаркы улантуучусу — Сокулуктагы айылдагы тогуз баладан турган топ болду. Алардын ашып-ташып кеткен байлыгы деле жок, бирок муктаждарга жардам берүүнү милдет деп эсептешкен.

БИШКЕК, 27-май— Sputnik. Сокулук районун Төш-Булак айылындагы мектепти мындан 10 жыл мурда аяктап кеткен бүтүрүүчүлөр аймактагы эки үй-бүлөгө кубаныч тартуулап, бирден тай сатып беришти. Бул туурасында айыл өкмөтүнүн жетекчиси Уранбек Кожокматов Sputnik Кыргызстан маалымат агенттигине билдирди. 

Жители села Тош-Булак Сокулукского района на юбилее окончание школы вместо выпускного подарили семье жеребца
© Фото / Нургазы Майрыков
Сокулук районун Төш-Булак айылындагы мектепти мындан 10 жыл мурда аяктап кеткен бүтүрүүчүлөр аймактагы эки үй-бүлөгө бирден тай сатып беришти.

Төш-Булак айылындагы Рапком Кулданов атындагы орто мектепти мындан он жыл мурда аяктап кеткен окуучулардын бул демилгеси айылдагы жүрөк жылыткан жакшы саамалыктардын бири болуп калды. 

"Мектепти 10 жыл мурда бүткөн балдар келип, кеңешти. Анан айылдагы социалдык паспорту бар, тагыраагы жардамга муктаж деген бүлөлөрдү башынан аяк карап чыгып, ушул эки бүлөгө токтодук", — деди айыл өкмөтүнүн жетекчиси Кожокматов.

Алардын биринчиси — үч баласын жалгыз багып жаткан Арина Мамбетазизованын бүлөсү. Анын жолдошу былтыр өтүп кеткен. Бүтүрүүчүлөрдүн белегине бөбөктөр чын дилден кубанып турган чагы. 

© Видео / Нургазы Майрыков
Төш-Булак айылындагы Рапком Кулданов атындагы орто мектепти он жыл мурда аяктап кеткен окуучулар жакшы саамалык баштады

Ал эми экинчи Канат Ташкеевдин үй-бүлөсү азыр жардамга болуп көрбөгөндөй муктаж, себеби үйдүн кожоюну былтыр ооруп, инсульт дартына чалдыккан.

Айылдаш инилеринин жардамы Ташкеевди гана эмес, анын балдарын, жубайын кошо толкундантты. 

"Айыл балдарынын биздин үй-бүлөгө берген бул жардамы моралдык жана материалдык жактан абдан маанилүү. Балдарга ыраазчылыктан башка эмне айтарымды билбей турам", — деди Ташкеевдин жубайы Сайра Дербишалиева.

"Улак сезону башталганда атты минип чыгып, балдар эл катарына кошула алат"

Жакшы саамалыкты уюштуруучулардын бири Нургазы Майрыков Sputnik Кыргызстан маалымат агенттигине ой кайдан кантип пайда болгонун айтып берди. 

"Ар ким өз мүмкүнчүлүгүбүзгө карап, айылда жардамга муктаж болгондор бар дегенде кол кабыш кылалы дедик. Адегенде эле бөбөктөрдү эстедик. Балдар алдыга позитивдүү маанай менен кадам шилтесин, "бизге жардам бере турган байкелер бар экен" деген сезим болсун дедик. Кыйналып жашаганда жаман ойлор келе берет го, биз мүмкүнчүлүгүбүз жетишинче балдарды ошондой жаман ойлордон коргонго аракет кылдык", — деди Нургазы.

Бул идеяны тогуз бала ишке ашырган. Алардын арасында типографисттер, аскер жана милиция кызматкерлери, анан да Кыргызстандын чемпиону болгон улакчылар бар.

Ал эми эмнеге жылкы алып бергендиктерин кайра эле ошол кичинекей балдардын маселеси менен байланыштырып айтып берди.

"Биздин айылда атка өзгөчө басым жасайт. Анын себебинин бири — көк бөрү боюнча атактуу командалардын бири "Бөрүлү" да биздин айылдан, алардын арасында биздин эки Айбек, Калысбек аттуу балдар ойношот. Андан уламбы, айтор, көк бөрүгө кызыгып, дээрлик ар бир үйдө ат кармашат. Кеңешип отуруп, жылкы сатып берсек, аны бөбөктөр күзүндө улак сезону башталганда минип чыгып, эл катарына кошулат деген ой болду",— деди ал.

Бүгүн 27-май, айылда акыркы коңгуроо жаңырды. Ал эми биздин каармандар — шаардан, район борборунан келип, Төш-Булакка чогулду. Мектепти бүтүргөн мезгилди эскерип, өтүп кеткен классташынын үйүнө барып, эскерип, куран окутушту. 

Биз өткөн материалыбызды бүтүрүүчүлөрдүн жакшы демилгесин жазууну улантууга убада бергенбиз, бул кезектеги материал болду. Кийинкиси дагы уланмакчы… 

Тема боюнча

Кымбат бүтүрүү кечелерин өткөргөндүн ордуна балдар үйүнө жардам берүү сунушталууда
Баткенде бүтүрүүчүлөргө Акыркы коңгуроодо коопсуздукту сактоону түшүндүрүп жатышат
Белгилер:
Сокулук, бүтүрүүчү, жылдык, тай

ЭҢ МААНИЛҮҮ