Депутат үч майрамды жоюп жаңы дем алыш күндөрүн киргизүүнү сунуштап жатат

© Sputnik / Табылды КадырбековКСДП фракциясынын депутаты Дастан Бекешев. Архив
КСДП фракциясынын депутаты Дастан Бекешев. Архив - Sputnik Кыргызстан
Жазылуу
Буга чейин өкмөт тарабынан үч майрамдык дем алыш күндөрүн алып салуу сунушталган.

БИШКЕК, 9-май — Sputnik. КСДП фракциясынын депутаты Дастан Бекешев үч майрамды жоюп салууну сунуштап жатат. Бул тууралуу ал өзүнүн жеке сайтына жарыялады. 

Анын айтымында, Кыргызстанда 13 майрамдык дем алыш күн болсо, анын айрымы өз маанисин жоготуп койгон.

Депутат Ата мекенди коргоочулар күнүн (23-февраль), Конституция (5-май) жана Улуу Октябрь социалисттик революциясын (7-ноябрь) белгилеген майрамдык күндөрдү жоюуну сунуштоодо. 

Өзгөртүү киргизүү зарылдыгы бар экендигине депутат бир катар аргументтерди келтирди.

"Ата мекенди коргоочулар күнү (23-февраль) бардык эркектердин майрамына айланып калды. Чындыгында өлкөдө жыл сайын 29-майда Куралдуу күчтөр күнү майрамдалышы керек", — деп айтылат мыйзам долбоордо. 

Башка өлкөлөрдүн тажрыйбасы: Казакстанда Ата мекенди коргоочулар күнү 7-майда майрамдалат (2012-жылы дем алыш күн катары кабыл алынган). Ал эми 23-февраль кадимки иш күн катары эсептелет. Ата мекенди коргоочулар күнү Тажикстан, Латвия, Армения жана Украинада дагы иш күн болуп эсептелет. 

Конституция күнү. Бекешев Конституциянын бир нече жолу өзгөрүүгө дуушар болгонуна байланыштуу эл 5-майды майрам катары эсептебей калганын айтат. Анын айтымында, бул дата коомчулук тарабынан жөн гана эс алуу күн катары кабыл алынып, үй-бүлөдө майрамдалбай калган. 

Мисал: Казакстанда конституция күнү 30-августта белгиленет. Ал эми Россияда эс алуу күн катары киргизилген эмес. 

Улуу Октябрь социалисттик революциясы. Кыргызстан постсоветтик өлкөлөрдүн арасынан 7-ноябрды майрамдаган жалгыз өлкө болуп эсептелет. Депутат билдиргендей жаштар бул датанын баалуулугун билбей калышты. Үй-бүлөлөрдө дагы майрамдалбай калган. 

Бирок Конституция күнү менен Улуу Октябрь социалисттик революциясы тарыхый мааниге ээ болгондуктан парламентарий эскерүү күнү катары кабыл алууну сунуштап жатат. 

Бекешев билдиргендей, буга чейин мындай сунуш өкмөт тарабынан берилген. Бирок Жогорку Кеңеш бул демилгени колдогон эмес.

Депутат жазган мыйзам долбоордо 7-апрель элдик революция күнү менен Улуу Жеңиш күнүн (9-май) дем алыш жана эскерүү күндөрү катары кабыл алуу сунушталган. 

Мындан сырткары, мыйзам долбоорунда энелер күнү (май айынын үчүнчү базарында майрамдалат) менен балдарды коргоо (1-июнь) күнүн дем алыш күн катары эсептөө сунушу айтылат. 

Депутаттын айтымында, бул күндөрдү дем алыш катары кабыл алуу энелер менен балдарга толук көңүл бурууга шарт түзөт.

Жаңылыктар түрмөгү
0