БИШКЕК, 4-апр. — Sputnik. Таржымалы интернет айдыңына тараган алты жашар Маликанын тилеги орундалып пианиного жетип отурат. Бул тууралуу Ololo art Studio студиясы билдирди.
Аз убакыттын ичинде кыздын окуясы шамалдай тарап, Анна Бардикова аттуу жаран өзүнүн аспабын Маликага берүүгө макул болгон. Анткен менен аспапты Военно-Антоновкадан үчүнчү кичи районго жеткирүү көйгөй жараткан.
Бардикова Sputnik Кыргызстан агенттигине өзү музыкалык мектепти аяктап, пианинодо ойногонду жактырарын билдирген.
"Убакыттын өтүшү менен пианинодо ойноого кызыгуум тарап, аспап бош эле жаткан. Интернеттен Малика тууралуу окуп калып, жардам берүүнү чечтим. Мага бул пианинону чоң атам белек кылган", — дейт Бардикова.
Студиянын кызматкерлери кайрымдуулук иш-чарасынан түшкөн акчага аспапты кызга жеткирип беришкен.
Маликанын апасы Айзада Жолдошеванын айтымында, кызы бул кабарды угары менен кубанычы койнуна батпай, аспапта ойногонду үйрөнүүнү баштады.
