10:21 07 Чын Куран 2020
Түз эфир
  • USD84.8713
  • EUR91.6016
  • RUB1.1108
Коом
Кыскача шилтеме алуу
62521

Уулунан ажыраган ата бул трагедиядан кийин мектепти бүтмөйүн, окуучуларды мечитке көп жолотпош керек деген пикирде калганын билдирди.

БИШКЕК, 2-мар. — Sputnik. Ош шаарынын Жапалак айыл өкмөтүнө караштуу Мээркан айылынын тургуну Базарбек Чоңмурунов 15 жаштагы уулунун асынып өлүшүнө мечитте айтылган ар кандай маалыматтар себепкер болушу мүмкүн деген пикирде. Бул туурасында ал Sputnik Кыргызстан маалымат агенттигине билдирди.

Ош шаардык ИИМдин маалыматында, 21-февраль күнү чак түштө Мээркан айылында жашаган 8-класстын окуучусу Жеңишбек Чоңмурунов асынып, жанын кыйган. Иликтөөлөр баланын өлүмүнө эмне себеп болгондугун аныктай элек.

"Мектепти бүткүчө балдарды мечитке жолотпош керек"

Ал эми баланын атасы Базарбек Чоңмурунов уулунун 15-20 күндөн тарта мечитке каттап, өлүм, каза болуп калган адамдар туурасында маалыматтарды көп айтып келе баштагандыгын айтып берди.

"Кенжетайым болчу. 15-20 күн мурда мечитке каттай баштады эле. Баламдын оозунан "өлсө мындай болот имиш","жаннатка чыгат экен", "апасы өлсө, мындай экен", "ата-энесине куран окутууну айтышты" деген сөздөрдү уга баштадым. Азыр муну эмне кыласың, андан көрө онунчу классты бүтүп, анан мечитке барсаң деле жетишесиң десем, ага көңүл деле бурган жок", — дейт Чоңмурунов.

Уулунан ажыраган ата бул трагедиядан кийин мектепти бүтмөйүн, окуучуларды мечитке көп жолотпош керек деген пикирде калганын билдирди.

"Балдарды 11-класска чейин мечитке жолотпош керек деген пикирге келдим. Аң-сезимин биротоло башка жакка буруп салат экен. Мектепти такыр карабай койду, мүнөзү өзгөрдү. Үйгө түндө, саат ондордо келет. Намазды үйдөн окусаң болот да, уулум деп да көрдүм. Тыянак чыккан жок", — деди үшкүрүнгөн атасы.

Чоңмуруновдун айтымында, материалдык жактан абалы начар эмес, колунда жетишерлик мал-жаны, техникасы бар, андыктан жанын кыйган уулунун "кандайдыр бир карыздары, материалдык жактан көйгөйү болушу мүмкүн эмес".

Баланын өлүмү боюнча кылмыш иши козголгон жок

Ош облустук ИИБдин маалымат кызматынын жетекчиси Жеңиш Ашырбаевдин маалыматында, бул окуя боюнча кылмыш иши козголгон жок. 

"Ата-энеси доосу жоктугун айтып, сөөктү соттук-медициналык экспертизага берген жок. Окуя кокустук катары катталды, бирок, кылмыш иши козголгон жок. Учурда өспүрүмдөр менен иштөө инспекциясы жана тергөөчү иликтөөнү улантып жатат", — деди Ашырбаев.

Ош шаардык ички иштер органдарынын өкүлдөрү каза болгон баланын ата-энесине кандайдыр бир шектенүү болсо эксгумация кылууну сунуш кылган. Бирок алар макул болгон эмес. 

Муфтият: мектептен мечитке чуркаган балдарды имамдын баяны токтотот

Бул окуядан кийин Кыргызстан мусулмандар дин башкармалыгына кайрылдык. Окуучулардын мектептен мечиттерге кетип жаткандыгын жөнгө салуу, мектепке тоскоол болбогондой кылып, диний жактан билим берүү жаатында пландалган иш-чаралардын бар-жоктугуна кызыгып көрдүк.

Бул жаатта муфтиятын үгүт-насыят бөлүмүнүн башчысы Билалидин Сайпиевдин пикирин уктук. 

"Христиандар, еврейлер үчүн жекшемби сыяктуу эле жума күнү бизде да дем алыш болгондо, "мечитке кетип калды" деген сөз чыкмак эмес. Менимче, дин, адеп-ахлак сабагын башка сабактардай кылып мектеп программасына киргизүү керек", — деди Сайпиев.

Ал абалдан чыгуунун дагы бир жолу катары имамдардын баяндарын мектептерде өткөрүү туурасында айтты.

"Балдар жума күнү мечитке имамдын жарым сааттык баянын угуу үчүн барат экен. Ошону мектепке уюштуруп берүү жолун издөө керек. Жумасына, же айына бир иреттен баян кылып берсек, бул дагы көйгөйдү оң жакка чечүүнүн жолу. Аталган маселени жакында Тоң районунда өтчү иш-чарада талкуулайлы деп жатабыз", — деди муфтияттын өкүлү.

ИИМдин өкүлү Ашырбаевдин маалыматында, өткөн жылы Ош шаары боюнча жашы жете элек 14 өспүрүм жанын кыйса, анын үчөөсү кыздар, 11и эркек балдар болгон.

Тема боюнча

Өзүн-өзү атып алган окуучунун өлүмү боюнча сот-медициналык экспертиза дайындалды
Белгилер:
мечит, мектеп, өлүм, ИИМ, Жеңиш Ашырбаев, Ош

ЭҢ МААНИЛҮҮ