Кыргызстандын 657 айылы таза сууга муктаж

© Sputnik / Табылды КадырбековКыргызстандын айылында жашоо. Архив
Кыргызстандын айылында жашоо. Архив - Sputnik Кыргызстан
Жазылуу
Өкмөттө макроэкономика жана инвестициялык саясат боюнча координациялык кеңештин жыйыны өтүп, анда таза суу менен камсыз кылуу жана алыскы аймактардын жолдоруна асфальт төшөө долбоорлору каралды.

БИШКЕК, 15-янв. — Sputnik. Кыргызстанда 1891 калктуу пункттун ичинен 657 айылды таза суу менен камсыз кылуу муктаждыгы бар. Бул тууралуу премьер-министр Темир Сариевдин жетекчилиги менен өткөн макроэкономика жана инвестициялык саясат боюнча координациялык кеңештин жыйынында белгилүү болду.

Маалыматка ылайык, буга 26 миллиард сом же 350 миллион доллар керектелери эсептелип чыккан. 2011-2014-жылдардын аралыгында Азия Өнүктүрүү Банкы жана Бүткүл дүйнөлүк банк менен келишим түзүлүп, 74 миллион сом насыя жана кайтарымсыз гранттын негизинде 545 айылда таза суу түтүктөрү жана суу сактоо жайлары курулган.

Таш айылынын тургуну Салима: биз өмүрү таза суу дегенди ичип көргөн эмеспиз
Бул долбоорду улантуу үчүн эми өкмөт Ислам Өнүктүрүү банкы тарабынан 15 миллион долларлык инвестиция тартуу боюнча иш алып барып жатканы белгилүү болду. 

Мындан тышкары, жыйында Ноокат районунун борбору жана Баткен шаарынын жолдоруна асфальт төшөө боюнча долбоор каралды. 

Транспорт жана коммуникация министрлигинин долбооруна ылайык, 511 миң 200 долларга аталган шаарлардагы 2,5 чакырым узундуктагы жолду асфальттоо каралган. Долбоорду Түштүк Кореянын экономикалык өнүгүү боюнча кызматташуу фондунан алынган жеңилдетилген насыянын эсебинен каржылоо пландаштырылган.

Сариев жолдорду оңдоого жумшалган каражаттардын эффективдүүлүгүн кароо зарылдыгын билдирди.

"Мында ар бир долбоорго 20 миллион сомго жакын каражат кетет экен. Бул менимче, кымбат. Биз алынган каражаттын эффективдүүлүгүн карап, сарамжалдуу пайдалануу менен мындан көп жолдорду курууга аракет кылышыбыз керек", — деди өкмөт башчы.

Премьер-министр калкты таза суу менен камсыз кылуу долбоорун улантууну, ал эми жолдор боюнча долбоорлорду кайрадан карап чыгууну тапшырды.

Жаңылыктар түрмөгү
0