Сариев: зилзаладан жабыркагандарга 200 миң өлчөмүндөгү ссуда өз убагында берилет

Жазылуу
Өкмөт башчы турак-жайлардын төрт типтүү долбоору иштелип чыгып, жабыркаган жарандар каалаганын тандап аларын, үйлөр ошого жараша курула турганын айтып өттү.

БИШКЕК, 30-ноя. — Sputnik. Жер титирөөдөн жапа чеккендер үчүн бөлүнгөн акча каражаты жɵнɵтүлбɵй калат деп тынчсыздануунун кажети жок. Бул тууралуу премьер-министри Темир Сариев Ошто жер титирɵɵнүн кесепеттерин жоюу жана элди убактылуу турак-жай менен камсыздоо боюнча иштин жүрүшү менен таанышуу учурунда билдирди.

Ошто жабыркагандарга гуманитардык жардам жүктөлгөн машиналар жөнөтүлдү
Маалыматка ылайык, өкмөт башчы иш сапардын жүрүшүндɵ Кара-Суу районунда болуп, жаратылыш кырсыгынын натыйжасында жабыркаган турак-жайларды кɵрүп, турак-жайлары жараксыз абалга келген жарандардын бардыгы жашоо-шартка ыңгайланган, жылууланган контейнерлер менен камсыздалгандыгын жеринен барып кɵрдү.

ӨКМ маалыматы боюнча, кырсыктан 6 миңден ашуун турак-жай иликтенген. Натыйжада 400 жакын үйдү калыбына келтирүүгɵ мүмкүн эмес деген тыянак чыккан.

Сариев Ош облусундагы жер титирɵɵ кесепетинен жабыркагандарга 200 миң сом ɵлчɵмүндɵ ссуда берилерин белгиледи.

"Акча каражаты жɵнɵтүлбɵй калат деп тынчсызданбаңыздар. Мындан тышкары, атайы эсепке түшкɵн каражаттар жабыркагандар жаңы турак-жай салуу үчүн бɵлүштүрүлɵт. Азыр атайы эсепте 13,5 миллион сом жана 51 миң АКШ доллары чогулган. Ошондой эле калыбына келтирүү иштерин жеңилдетүү максатында курулуш дүкɵндɵрү ачылып, анда тɵмɵнкү баада керектүү материалдарды сатып алууга мүмкүндүк түзүлɵт", — деп билдирди ал.

Өкмɵт башчы турак-жайлардын төрт типтүү долбоору иштелип чыгып, жабыркаган жарандар ɵзүнүн каалаганын тандап аларын, үйлөр ошого жараша үйлɵр курула турганын айтып өттү.

Жер титирɵɵнүн кесепеттерин жоюу иштери менен таанышуу учурунда премьер-министр жергиликтүү калк менен баарлашып, айрым маселелерди жеринен чечип берди. 

Жаңылыктар түрмөгү
0