Жер титирөөдөн жапа чеккендерге өкмөт бир күндүк айлыгын которот

Жазылуу
Жасалып жаткан иш-аракеттерге карабастан, учурда аталган аймакта жардамга муктаж адамдардын саны арбын бойдон калууда.

БИШКЕК, 20-ноя. — Sputnik. Өкмөт мүчөлөрү жана аппарат кызматкерлери Ош облусунда жер титирөөдөн жапа чеккен жергиликтүү калкка бир күндүк эмгек акысын которо турганын өкмөттүн маалымат кызматы билдирди.

Үстүбүздөгү жылдын 17-18-ноябрь күндөрү Оштун Кара-Суу жана Алай райондорунда 7 баллдан 4 баллга чейинки үч ирет жер титирөө болуп, андан алдын ала маалымат боюнча 390 үй жараксыз абалга келген. Мындан тышкары, бир турак жайдан жарака кетип, кооптуулукту жаратууда.

Жер титирөөдөн жабыркаган үй. Архив - Sputnik Кыргызстан
Кыргызстандагы кен казуучу компаниялар зилзаладан жабыркагандарга жардам берет
Учурда убактылуу баш паанек үчүн жергиликтүү жашоочуларга боз үй менен чатырлар жеткирилүүдө. Кырсыктын кесепетин көрүүгө барган премьер-министр Темир Сариев мамлекет колунан келген жардамдын баарын көрсөтө турганын айтып, жакын арада үй-жайсыз калган тургундарды мобилдик үйлөр менен камсыздоону убада кылган.

Буга чейин Мамлекеттик геология жана минералдык ресурстар агенттигинде өткөн чогулуштун жыйынтыгы менен Кыргызстандын аймагында иштеген тоо-кен компаниялары контейнер, акчалай жардам түрүндө колдоо көрсөтө баштады.

Ушу тапта Өзгөчө кырдаалдар министрлиги күчөтүлгөн тартипте иш алып барып, калкты тийиштүү нерселер менен камсыздоо боюнча аракеттерди көрүп жатат.

Жасалып жаткан иш-аракеттерге карабастан, учурда аталган аймакта жардамга муктаж адамдардын саны арбын бойдон калууда. Кырдаалды суук аба ырайы курчутуп жатканы айтылып жатат.

Жаңылыктар түрмөгү
0