Беш миллионунчу кыргызстандык быйыл биринчи мүчөлүү жашын белгиледи

БИШКЕК, 13-ноя. — Sputnik. Борбор калаанын башчысы Кубанычбек Кулматов Кыргызстандын беш миллионунчу жашоочусу Тынчтыкбек Курамаевге портативдүү компьютер белек кылганын муниципалитеттин маалымат кызматы билдирди.

Тынчтыкбек Кенжебек Курамаев менен Бакбүбү Жапарованын үй-бүлөсүндө 2002-жылдын 27-августунда жарык дүйнөгө келип, шаардык муниципалитеттин камкордугуна алынган.

Учурда Тынчтыкбек 13 жашка толду, ал Бишкектеги №2 мектептин 7-классында окуйт. Ушул эле окуу жайдын 4-классында анын карындашы кичинекей Айдана билим алат.

Мэриянын билим берүү башкармалыгы Курамаевге ар убак колдоо көрсөтүп турат.

"Мектепте Тынчтыкбекти жакшы окуган, сый-урматка татыктуу бала катары мүнөздөшөт", — деп айтылат билдирүүдө.

2002-жылы баланын ата-энесине шаардын чок ортосунан үч бөлмөлүү батир берилген. Тынчтыкбектин айтымында, ал көркөм жана фантастикалуу адабиятка кызыгып, самбо менен машыгат.

Кулматов балага ийгилик каалап, коюлган максаттарынын орундалышын каалады.

Улуттук статистикалык комитеттин маалыматы боюнча ноябрь айынын соңунда Кыргызстандын алты миллионунчу тургуну төрөлүшү керек.