БИШКЕК, 12-ноя. — Sputnik. Австралияда жашаган кыргызстандыктар Канберра шаарынын GIO Stadium стадионундагы күйөрмандарга бөлүнгөн бардык орунду сатып алышканын Наргиза Хакимова билдирди.
Кыргызстан менен Австралиянын футбол боюнча курама командалары Бишкек убактысы боюнча саат 15.00дө Канберра шаарында беттешет. Оюнда кыргызстандык 100дөн ашык күйөрман командасын сүрөөнгө алат.
Кыргызстандык күйөрмандар үчүн бөлүнгөн 140 орундун баары сатылып алынган. Алардын арасында Футбол федерациясынын делегациясы үчүн да орундар каралган.
GIO Stadium стадионуна 25 миң 11 күйөрман батат.
Эки команда буга чейин Бишкек шаарында беттешип, австралиялыктар 1:2 эсебинде жеңишке жеткен.
Беш оюндун жыйынтыгы менен Иордания 13 упай менен ишенимдүү түрдө биринчи орунда келе жатат. Экинчи орунда тогуз упай менен австралиялыктар келе жатат, анын запаста дагы бир оюну бар. Кыргызстан сегиз упай менен үчүнчү орунда. Төртүнчү орунду эки упай менен Тажикстандын командасы камсыздаса, болгону бир упай менен Бангладеш акыркы орунда.