БИШКЕК, 28-авг. — Sputnik. Жаңы окуу жылынан баштап мектепке чейинки даярдык боюнча 480 сааттык жаңы программа киргизиле турганы Билим берүү кызматкерлеринин III съездинде белгилүү болду.
Иш-чарада министрлик тарабынан киргизилип жаткан 480 сааттык "Наристе" программасы тууралуу кенен маалымат берилди. Катышуучулар буга чейинки 100 жана 240 сааттык программаны киргизүүдөгү айрым көйгөйлөр менен таанышып чыгышты.
"Тажрыйба бул программалардын натыйжалуулугу төмөн экенин көрсөттү, анткени балдар менен туруктуу жана системалуу түрдө гана иш алпаруу оң жыйынтык берери анык. Буга байланыштуу бардык мектептерде жана бала бакчаларда балдарды мектепке даярдоо боюнча 480 сааттык "Наристе" программасы киргизилип жатат", — деп айтылат билдирүүдө.
"Наристе" программасы жаңы стандартта билим ала турган башталгыч класстын балдарына коюлуучу талаптардын негизинде иштелип чыккан. Долбоордун ийгиликтүү ишке ашуусу үчүн министрлик класстарды тийиштүү окуу куралдары, эмерек жана жабдык менен камсыздай турганын белгиледи.
Республиканын бардык аймагынан келген билим берүү кызматкерлеринин башын бириктирген съезд 26-27-август күндөрү Бишкекте өттү. Билим берүү системасында жүргүзүлгөн иш-аракеттердин жыйынтыгын чыгаруу жана 2015-2016-жылдарга карата өнүгүү багытын аныктоону аксаттаган съездде беш блокко бириикен 11 секция иш алып барды.
