БИШКЕК, 23-авг. — Sputnik. Ажылык сапарга аттанган зыяратчылар учуу күнү аэропортко белгиленгенден беш саатка эрте келиши керектиги борбордук мечитте өткөн жыйында белгилүү болду.
Жыйынга Кыргызстан мусулмандарынын Азирети муфтийинин орун басары Эратов Равшан ажы, КМДБнын ажsлык бөлүмүнүн кызматкерлери, кыргыз авиациясынан жана Сауд Аравиясынын "Флай-Нас" авиакомпаниясынан бир өкүл келип учуу тартиптери, жол жүктү алуу шарттары туурасында кеңири түшүндүрүп беришти.
"Учуу күнү зыяратчылар каттоого беш саат мурун келиши керек. Учуу убактысына бир саат калганда эшик толугу менен жабылып, учактын ичинде зыяратчыларды жайгаштыруу тартиптери, коопсуздук жана техникалык эрежелери түшүндүрүлөт", — деди "Флай-Нас" авиакомпаниясынын өкүлү.
Азирети муфтийдин орун басары ажылык иш тактыкты жана жоопкерчиликти талап кыларын, ар бир ажы башчы өз тобуна кам көрүүсү милдет экенин баса белгиледи.
Быйыл кыргызстандык зыяратчылар Сауд Аравиясына 27-августтан 13-сентябрга чейин учуп, 15-октябрга чейин кайра кайтып келишет. Ал эми ажылык сапардын баасы 2550 долларды түздү.
