БИШКЕК, 26-май — Sputnik. Кыргызстан менен Россиянын десантчылары РФтин КРдеги объектерин коргоо боюнча биргелешкен машыгууларды өткөрүүдө. Бул тууралуу Россиянын Борбордук аскер округунун аскер кол башчысынын орун басары Евгений Устинов билдирди. Бул туурасында РИА Новости кабарлады.
Россиянын аба-десант аскерлери жана КРдин Улуттук Гвардиясынын атайын даярдыктагы "Пантера" тобунун аскерлери дүйшөмбү күнү биргелешкен машыгууларын баштады. Машыгуулар КР Улуттук Гвардиясынын бешинчи бригадасынын аймагында жана "Кант" авиабазасында өтүп жатат. Ал 5-июнга чейин улантылат.
"Биз аба, курал атуу жана чалгындоо боюнча атайын тактикаларды биргеликте иштеп чыгуудабыз. Ошондой эле өзү учкан аскердик техникаларды колдонуп жатабыз", — деди Устинов.
Учурда Россиянын Кыргызстанда жарандык жана аскердик багыттагы бир нече объектилери бар. Алардын катарында Караколдогу сыноо базасы, Чалдыбардагы байланыш түйүнү жана Майлуу-Сууда автономдуу сейсмикалык пункту бар. Он эки жыл мурун Бишкектен алыс эмес Кант шаарында Жамааттык коопсуздук келишим уюмунун авибазасы жайгаштырылган.
