БИШКЕК, 14-май — Sputnik. Ош шаарындагы "Сулайман-Тоо" медресесинде жаш балдарды массалык сүннөткө отургузуу боюнча эки күндүк иш-чара башталды.
Бул иш-чараны Түркиядан келген хирург дарыгерлер жасап жатышат. Алар бир күндө отузга жакын баланы отургузуп жатат.
"Сүннөткө отургузуу заманбап шарт менен жасалып жатат. Былтыр да мындай иш-чарада 350 бала сүннөткө отургузулган", — деп билдирди Ош облусунун мусулмандар казыятынын маалымат кызматы.
Бул иш-чара андан ары Өзгөн району, Жалал-Абад жана Баткен облустарында улантылмакчы.
Маалымат кызматы балдарды отургузуу ишине түркиялык ишкер Мехмет Өз Түрк демөөрчүлүк кылып жатканын билдирди. Иш-чарага Ош облусунун казысы Ниязали ажы Арипов, Ош шаарынын казысынын орун басары Анасхон Ташхожаев, Түркиянын Кыргызстандагы элчисинин кеңешчисинин жардамчысы Мустафа Шамбер жана шаардык кеңештин депутаттары катышты.
