БИШКЕК, 9-май — Sputnik. Кыргызстан 9-май Жеңиш майрамын жамгыр менен тосо турган болуп калды. Өзгөчө кырдаалдар министрлиги өлкөдө 9-10-майда аба ырайы бузулуп, жамгыр болорун билдирди.
"9-10-майда аба ырайынын кескин өзгөрүлүшү күтүлүп, мезгил-мезгили менен жаан жаап, күн күркүрөшү, бийик тоолуу аймактарда кар жаашы, айрым жерлерде жаан-чачындын арбын болуусу күтүлөт. Кээ бир райондордо батыштан соккон шамалдын ылдамдыгы секундасына 17-22 метрге чейин жетет",— деп билдирди аталган министрликтин маалымат кызматы.
Өзгөчө кырдаалдар министрлигинин маалымат кызматы абанын күндүзгү температурасы кескин төмөндөп: Чүй, Талас облустарынын дыйканчылык аймактарында +12…+22°, Ош, Жалал-Абад, Баткен облустарынын дыйканчылык аймактарында +20…+25°, тоо этектеринде +10…+15° жылуу, бийик тоолуу райондордо 0…+5° жылуу болушу күтүлөөрүн билдирди.
9-майда Кыргызстандын бардык шаарларында Улуу Жеңиштин 70 жылдыгына карата майрамдык иш-чаралар өтөт. Бишкек шаарында борбордук "Ала-Тоо" аянтында аскердик парад өтүп, аны театрлаштырылган оюн-зоок улантат.
LIVE: Жаштардын "Мен чоң атам менен сыймыктанам" жүрүшү >>>
