Улуу Ата мекендик согуш боюнча архивдик маалыматтар камтылган интернет-портал ишке кирди

Жазылуу
Кыргызстандын интернет мейкиндигинде бул мындай мазмундагы биринчи ресурс. Порталдын маалымат топтомунда согуш мезгилиндеги кыргызстандыктар тууралуу 140 миңдей маалымат, архивдик материалдар, китептер камтылган.

БИШКЕК, 7-май — Sputnik. Жеңиш күнүн белгилөөгө карата Мамлекеттик каттоо кызматы (МКК) pobeda.srs.kg интернет-ресурсун ишке киргизди. 

Порталдын уникалдуулугу – анда Улуу Ата мекендик согуш мезгилине тиешелүү документтердин электрондук архиви камтылган деп билдирди МККнын маалымат кызматы.

Кызматтын төрагасынын орун басары Дастан Догоевдин сөзүнө караганда, интернет-ресурстан курман болгондор жана дайынсыз жоголгондор жөнүндө маалымат тапса болот. Ошондой эле согуштун катышуучуларын издөө жол-жоболору да иштелип чыккан.

"Кыргызстандан ал согушка 370 миңден ашык адам катышкан. Бүгүнкү күндө Кыргызстанда согуштун 5991 катышуучусу жана ооруктун эмекчилери жашап жатат. Тарыхчылардын айтымында, согуштун биринчи күндөрү эле Кыргызстандан фронтко өз ыктыяры менен кетүүнү каалаган жарандар чыккан", — дейт ал. 

Догоев аталган долбоор МКК тарабынан демилгеленип, "Инфоком" МИ ишке ашырганын билдирди.

Ал белгилегендей, Кыргызстандын интернет мейкиндигинде бул мындай мазмундагы биринчи ресурс. Порталдын маалымат топтомунда согуш мезгилиндеги кыргызстандыктар тууралуу 140 миңдей маалымат, архивдик материалдар, китептер камтылган.

"Келечекте архивдик маалыматтарды кеңейтүүнү пландап жатабыз", — дейт "Инфоком" МИ директору Талант Абдуллаев. 

Улуу жеңиштин 70 жылдыгына арналган интернет-сайт РФте иштей баштады
Аталган портал эки тилде экенин белгиледи ал. Сайттын маанилүү бөлүгү болуп согуш мезгилинде курман болгон жана дайынсыз жоголгон жоокерлер боюнча маалымат топтому, Кыргызстандан чакырылган согуштун катышуучулары жөнүндө маалымат издөө эсептелет.

Долбоор Россиянын Коргоо министрлиги, КРдин Коргоо кеңеши жана МККнын архивдик агенттиги менен кызматташтыкта ишке ашты. 

Фашисттерге каршы күрөштө көрсөткөн эрдиги үчүн 74 кыргызстандык жоокер Советтер Союзунун баатыры наамын алган. 21 кыргызстандык Даңк орденин үч даражасына ээ болгон. Ал эми 150 миң кыргызстандык өз каармандыгы үчүн орден жана медалдар менен сыйланган.

Жаңылыктар түрмөгү
0