БИШКЕК, 27-фев. — Sputnik. Минск шаарында мыкаачылык менен өлтүрүлгөн кримтөбөл Алмамбет Анапияевдин сөөгү бүгүн эртең менен Москва – Ош каттамы аркылуу алынып келгенин анын жактоочусу Данияр Маманов Sputnik сайтынын кабарчысына билдирди.
Анын айтымында, сөөк дароо эле Анапияевдин туулган айылы Алай районундагы Жекенди айылына жөнөтүлдү. Аталган айылдын мечитинин имамы Маматали молдо сөөк бүгүн жерге бериле турганын билдирди.
Колу-буту байланган эркек кишинин жансыз денеси 18-февралда Белоруссиянын борбору Минск шаарынын Карл Либкнехт көчөсүндө автоунаанын багаж бөлүгүнөн табылган. Анын жанынан Шакиров Алмазбек Мийзамовичтин наамына берилген Россиянын паспорту табылган.
Беларуссияга келген туугандары өлгөн адам эл аралык издөө жарыяланган Анапияев экендигин таанышкан.
Окуяга күбө болгон Гүлжигит Абилазизовдун берген көрсөтмөсүнө ылайык, кримтөбөлдү өлтүрүүгө Жаныш Бакиевдин катыштыгы болушу мүмкүн. Себеби, ал Жаныш Бакиевге окшош кишини Анапияев өлөр күнү анын үйүнөн көргөнүн айткан.
Өз кезегинде президент Алмазбек Атамбаев Кыргызстанда оор кылмыш жасаган деп сыртынан соттолуп, эл аралык издөө жарыяланган Бакиевдерди Кыргызстанга кайтарып берүү боюнча кайрылуу жасады.
