Исаев: жаңы Конституциянын автору — Садыр Жапаров, ага депутаттардын тиешеси жок

© Sputnik / Табылды КадырбековЖК депутаты Канат Исаев. Архив
ЖК депутаты Канат Исаев. Архив - Sputnik Кыргызстан
Жазылуу
Бүгүн демилгечи катары жаңы долбоорго кол койду делген дагы бир депутат кол тамагасын артка чакыртып алганы белгилүү болду.

БИШКЕК, 19-ноя. — Sputnik. Жаңы сунушталган конституциялык долбоордун автору — Садыр Жапаров. Бул туурасында экс-спикер, ЖК депутаты Канат Исаев маалымат жыйын учурунда билдирди.

Ал президенттик башкарууга ыктаган Баш мыйзамга каршылыгын айтып, анын ордуна партиялык системаны өздөштүрүү керектигин белгиледи.

"Эгер ачык айта турган болсок, жаңы Конституциянын автору — Садыр Жапаровдун өзү. Себеби ал буга чейин долбоор даярдалып жатканын, ЖКнын кароосуна киргизилерин айтып жаткан. Бирок бир дагы депутат демилгечи же автор болгон эмес. Мындан улам бул президенттин же өкмөттүн аппаратында жазылган деп ойлойм. Жаңы Конституциянын долбооруна демилгечи делген депутаттар менен да сүйлөштүм. Көпчүлүгү окубай туруп эле кол койгон экен. Бул нерсе парламентте ачык-айкын каралып, авторлору так көрсөтүлүшү керек", — деди Исаев.

Ошондой эле бүгүн "Кыргызстан" фракциясынан демилгечи катары көрсөтүлгөн депутат Бектен Сыдыгалиев кол тамгасын артка чакыртып алганын кошумчалады.

Мындан сырткары, Исаев мөөнөтү аяктаган парламент талаш-тартыш учурунда Баш мыйзамды өзгөртүүгө аракет кылбашы керектигин белгиледи.

Жогорку Кеңештин имараты. Архив - Sputnik Кыргызстан
ЖК оюн эрежесин өзгөрттү. Венеция комиссиясы шайлоонун жылдырылышына кабатыр
"Президенттик башкаруунун аягы эмне болгонун 2005 жана 2010-жылы көрдүк го. Ал эми бир мандаттуу шайлоо болсо бир да аял, жаш муун, майыптар келбейт, жалаң байлар шайланат. Маселе Конституцияда эмес, адамдардын өзүндө. Азыркы мыйзамдар менен башкарууга шарт бар, мында бийлик бутактарынын тең салмактуулугу сакталган", — деди депутат.

Эске салсак, 21-октябрда Борбордук шайлоо комиссиясы жаңы парламенттик шайлоо мөөнөтүн 20-декабрга койгон. Бирок эртеси эле Жогорку Кеңеш мыйзам кабыл алып, ага ылайык, шайлоо күнү конституциялык реформадан кийин, бирок 2021-жылдын 1-июнунан кеч эмес мөөнөткө белгиленген. Ага ошол убактагы президенттин милдетин аткаруучу Садыр Жапаров кол койгон.

Жаңылыктар түрмөгү
0