Жогорку Кеңештин төрагасы: басым жасабай иштөөгө шарт түзүп бериңиздер!

Жазылуу
Төраганын айтымында, акыркы эки күн ичинде фракция лидерлери жана депутаттык топтор менен болгон сүйлөшүүлөрдө бардык тараптар консенсуска келип, кырдаалдан чыгуу боюнча кандайдыр бир чечим табууга даяр экендигин билдиришкен.

БИШКЕК, 9-окт. — Sputnik. Жогорку Кеңештин төрагасы Мыктыбек Абдылдаев кыргызстандыктар менен саясий лидерлердин жетекчилерине кайрылуу жасады.

Ал учурдагы абал өтө оор экенин билдирген.

"Президент Сооронбай Жээнбековдун түндө кырдаал турукташкандан кийин кызматтан кетүүгө даяр экендигин жарыялаганын жылыш деп эсептейбиз. Эми чукул арада Жогорку Кеңештин кезексиз жыйынын өткөрүп, өлкөбүздү мыйзам нугуна кайтарып келүү вазыйпасы турат. Бул үчүн Жогорку Кеңештин депутаттарына өкмөт башчылык кызматка кызыкдар тараптардын тирешүүсү жана басымынан тышкаркы шарттарда иштөөгө мүмкүнчүлүк түзүлүшү керек. Бийлик кимдин жактоочулары көп болсо, ошол тарапка оошу керек деген түшүнүк менен эмес, Баш мыйзамыбызда жазылгандай, шайлоонун жыйынтыгы аркылуу гана бөлүштүрүлүшү зарыл. Андыктан бардыгыңыздарды тез аранын ичинде тарапташтарыңыздарга түшүндүрүү иштерин жүргүзүп, өлкөбүзгө тартип жана тынчтыкты орнотуу керек экенин унутпаңыздар", — деди Абдылдаев.

Анын айтымында, акыркы эки күн ичинде фракция лидерлери жана депутаттык топтор менен болгон сүйлөшүүлөрдө бардык тараптар консенсуска келип, кырдаалдан чыгуу боюнча кандайдыр бир чечим табууга даяр экендигин билдиришкен.

"Ушул тапта Жогорку Кеңештин жыйынын, коопсуздукту жана депутаттардын эркин ой билдирүү укугун сактоо менен өткөрүү абдан маанилүү. Мамлекетибиздин алдында оор сыноолор турат. Элибиздин демейдегидей бейпил жашоо турмушуна кайтып келүүсүн камсыздап, кышка даярдык көрүү, экономиканы жандандыруу, пандемиянын экинчи толкунуна даярдануу чакырыктары турат. Булардын бардыгы мамлекетибиздин ичиндеги ынтымак жана тынчтыкты бекем сактоого байланыштуу болот", — деди төрага.

Ал өлкөнүн бүтүндүгү жана элдин бейпил жашоосу үчүн саясий амбицияларды кое туруп, тараптардын биримдикке келүүсүн өтүндү.

Жаңылыктар түрмөгү
0