"Унаанын" директору Козубаевге иш козголуп, кызматтан алуу сунушталды

© Фото / Усеин Касмалиев"Унаа" мамлекеттик мекемесинин директору Алымжан Козубаев. Архив
Унаа мамлекеттик мекемесинин директору Алымжан Козубаев. Архив - Sputnik Кыргызстан
Жазылуу
Бүгүн, 30-январда, Коопсуздук кеңешинин жумушчу тобу жыйын өткөрүп, "Унаа" мекемесинин ишмердүүлүгүн карап, бир топ каталарды санап беришкен.

БИШКЕК, 30-янв. — Sputnik. "Унаа" мамлекеттик мекемесинин директору Алымжан Козубаевге кылмыш иши козголуп, кызматынан бошотуу сунушталды. Бул туурасында өлкө башчынын маалымат кызматы билдирди.

Ага ылайык, бүгүн, 30-январда, Коопсуздук кеңешинин коррупцияга каршы мамлекеттик саясат стратегиясын ишке ашырууну көзөмөлдөө боюнча жумушчу тобу жыйын өткөрүп, "Унаа" мекемесинин ишмердүүлүгүн караган.

Кеңештин катчысы Дамир Сагынбаев жүргүзүлгөн мониторингдерге ылайык, мекемедеги коррупциялык системаны жокко чыгаруу боюнча планга киргизилген иштердин жарымынан көбү аткарылбай калганын айтты. Тагыраагы, пландагы 148 иш-чаранын 83ү аткарылган эмес. Жумушчу топтун практикасында иштердин аткарылбаганы боюнча мындай көрсөткүч (56%) биринчи жолу байкалган.

Ошондой эле мекеменин жетекчилиги арыздарды жана автоунааларды каттоо жана кайра каттоо үчүн тийиштүү документтерди онлайн жөнөтүү механизмин иштеп чыгып, киргизген эмес.

"Мындан улам "Унаанын" ишмердүүлүгүндө коррупциялык тобокелчиликтер болууда. Андан тышкары, айдоочулук укуктан ажырагандар жөнүндө документтердин автоматташтырылган маалыматтар базасына өзгөртүүлөр киргизилбептир. Мекеменин ишмердүүлүгүн санариптештирүү боюнча мурда пландалган бир катар долбоорлор да ишке ашырылган эмес. Ченемдик-укуктук базанын ревизиясы жүргүзүлбөй, автоунааларды жокко чыгарууда регламентте каралган нормативдик-укуктук актылардын долбоорлору иштелип чыккан эмес", — деп айтылат маалыматта.

Очередное заседание Совета безопасности КР - Sputnik Кыргызстан
Жээнбеков: кол алдындагысы пара менен кармалса, жетекчи иштен кетиши керек
Муну менен бирге укук коргоо органдары тарабынан "Унаа" мекемесинин кызматкерлерине 2018-2019-жылдар аралыгында 100дөй кылмыш иши козголуп, алар боюнча сотко чейинки өндүрүш башталган.

Ал эми мекеменин жетекчиси Алымжан Козубаевге сотко чейинки өндүрүш өзүнчө ачылганы айтылды.

Жумушчу топтун отурумунун жыйынтыгында мекеменин коррупцияны жоюу боюнча иш-аракети канааттандырарлык эмес деп табылып, өкмөткө жетекчиси Козубаевди иштен алуу сунушталган. Отурумда каралган материалдар юридикалык баа берүү үчүн Башкы прокуратурага жөнөтүлөрү кошумчаланды.

Буга чейин Sputnik Кыргызстан агенттиги Алымжан Козубаевдин кадр маселесинде шек жараткан коррупциялык иштери тууралуу материал даярдаган.

Жаңылыктар түрмөгү
0