Эмне илең-салаң болуп жатасыңар! Жанар Акаев депутат, аткаминерлерге ызаланды

© Фото / пресс-служба ЖКЖК депутаты Жанар Акаев. Архив
ЖК депутаты Жанар Акаев. Архив - Sputnik Кыргызстан
Жазылуу
Жогорку Кеңештин жалпы жыйынында аңчылыктын айрым түрлөрүнө тыюу салуу боюнча мыйзам долбоору талкууланып жатат.

БИШКЕК, 23-окт. — Sputnik. Депутат Жанар Акаев айрым жаныбарларга аңчылык кылууга тыюу салуу боюнча мыйзам долбоору талкууланып жатканда кесиптештерине жана өкмөттүн өкүлдөрүнө ызаланды.

Аңчы. Архив - Sputnik Кыргызстан
Өкмөт аңчылыкка тыюу салган мыйзам долбооруна каршы чыкты
Бүгүн парламенттин жалпы жыйынында аркар-кулжа, теке-эчки, элик, марал-бугу жана доӊузду атууга 2020-жылдан 2030-жылга чейин мораторий киргизүү боюнча мыйзам долбоору талкууланууда.

Ал ортодо депутат Бактыбек Турусбеков микрофонго чыгып, тармактык комитет "макул" же "каршы" деп корутунду чыгарбагандыктан долбоорду кайра комитетке жиберүүнү сунуштады. Буга мыйзамдын демилгечилеринин бири Жанар Акаев макул болбой, ачуу сөзүн айтты.

"Биз демилгечи катары айтып коёлу, комитеттин чечими бар. Кайсы бир депутатка бул мыйзам долбоору жакпаса, каршы добуш берсин. Бир-эки депутаттын ою менен эле талкууну токтотуп коёбузбу?! Азыр бүт дүйнө жашыл экономика, жаратылышты коргоо жана ак илбирсти сактоо саясатын жүргүзүп жатат. Кыргыз парламенти четке кагып койсок уят болобуз. Бул мыйзам абдан туура, колдошубуз керек. Силердин атыңар айлана-чөйрөнү коргоо (Айлана чөйрөнү коргоо жана токой чарба агенттигинин орун басарына кайрылып — ред.) деп аталат. Оозуңар бош, "бизге мораторий керек, жан-жаныбарларды коргойлу" деп ачык, конкреттүү айтпайсыңарбы, эмне илең-салаң болуп жатасыңар!" — деди Акаев.

Ал эми Агрардык саясат, суу ресурстары, экология жана регионалдык өнүктүрүү боюнча комитеттин төрагасы Нурбек Алимбеков бул мыйзам долбоору комитетте кызуу талкууланып добуштар тең чыгып калгандыктан, "жалпы жыйында чечилсин" деп жиберишкенин айтты. Ал кайра артка кайтарууга негиз жоктугун белгиледи.

Натыйжада төрага Бактыбек Турусбековдун сунушун добушка коюп, бирок колдоо тапкан жок. Талкуу уланууда.

Жаңылыктар түрмөгү
0