БИШКЕК, 28-май — Sputnik. Президент Сооронбай Жээнбеков 28-31-май аралыгында үч мамлекетке иш сапары менен бара турганын өлкө башчынын маалымат кызматы билдирди.
Президенттик аппараттын тышкы саясат бөлүмүнүн жетекчиси Данияр Сыдыковдун айтымында, 28-29-май күндөрү Казакстандын Нур-Султан шаарында Евразиялык экономикалык кеңештин мааракеси өтөт. Анда Жээнбеков Казакстандын президенти Касым-Жомарт Токаев жана өлкөнүн биринчи президенти Нурсултан Назарбаев менен жолугушуп, эки тараптуу мамилелер боюнча маселелердин бардык багыттарын талкуулайт.
30-майда Жээнбеков Индиянын премьер-министри Нарендра Модинин чакыруусу менен аталган өлкөгө барып, лидердин инаугурация аземине катышмакчы.
Ал эми 31-май күнү Сауд Аравияга учат. Бул мамлекетке король Салман бин Абдель Азиз Аль Сауд чакыруусу менен барып, Мекке шаарында өтө турган Ислам кызматташтык уюмунун 14-саммитине катышат.
Саммитинин кезектеги сессиясы уюмдун түзүлгөндүгүнүн 50 жылдыгына арналып, "Келечек үчүн бирге" чакырыгы астында өтөт.
