Азимбек Бекназаров УКМКнын койгон айыбына жооп кайтарды

© Sputnik / Табылды КадырбековЭкс-депутат Азимбек Бекназаров. Архив
Экс-депутат Азимбек Бекназаров. Архив - Sputnik Кыргызстан
Жазылуу
УКМК Бекназаровду Текебаев менен Чотоновдун сотунда жалган көрсөтмө берген деген негиз менен кылмыш ишин козгогон.

БИШКЕК, 6-сен. — Sputnik. Коомдук ишмер Азимбек Бекназаров Улуттук коопсуздук мамлекеттик комитетинин (УКМК) ага койгон айыптары катардагы кара пиар экенин Sputnik Кыргызстан агенттигине билдирди.

Жогорку Кеңештин экс-төрагалары Өмүрбек Текебаевдин архивдик сүрөтү - Sputnik Кыргызстан
БШК Текебаев менен Келдибековду шайлоодон четтетти
Белгилей кетсек, Бекназаровго карата Өмүрбек Текебаев менен Дүйшөнкул Чотоновдун сотунда жалган көрсөтмө бергени үчүн кылмыш иши козголгон. Интернетке тарап кеткен аудиодон Бекназаров менен Ташиевдин үнүнө окшош кишилер сүйлөшүп отурганын угууга болот. Бекназаровдун сүйлөгөнүнө окшогон үн "Текебаевдин сотунда болушунча калп айттым" дегенин тыңдоого болот.

УКМК тараткан билдирүүдө Алматы шаарында жүргүзүлгөн фоноскопиялык изилдөө аудио жана видеожазуудагы үн Бекназаровго таандык экенин аныктаганы жазылган.

Бекназаров ага карата козголгон кылмыш иши президенттик шайлоо алдындагы катардагы эле кара пиар экенин белгиледи.

"Мен президенттикке талапкер катары катталдым. Ошого байланыштуу ар кандай кара пиар, ушуга окшогон башка нерселер болуп кетиши мүмкүн. Бул калп айтты деп элге жаманатты көрсөтүш үчүн козголгон кылмыш иш", — деди ал.

Бекназаров ошондой эле ал кайсы калпты айтканын УКМК тактап жазса болмок деген пикирин айтты.

"Бекназаров момундай деп Текебаевдин сотунда калп айтыптыр деген нерсеси жазылбай жатпайбы? Булар ошол нерсени так айтышкан жок да", — деди ал.

Эске салсак, 16-августта Биринчи Май райондук соту Өмүрбек Текебаев менен Дүйшөнкул Чотоновдун ишин карап, аларды коррупция беренеси боюнча күнөөлүү деп таап, сегиз жылга эркинен ажыраткан. Текебаевдин жактоочулары райондук соттун өкүмүн шаардык сотко арызданган, сот иши 5-сентябрда Бишкек шаардык сотунда каралып, кийинки отурум 7-сентябрга белгиленди.

Жаңылыктар түрмөгү
0