Мамлекеттик каттоо кызматы башкы прокуратурага жооп берди

БИШКЕК, 9-фев. — Sputnik. Башкы прокуратуранын Мамлекеттик каттоо кызматына коюп жаткан айыптоолору чындыкка дал келбей турганын аталган кызматынын маалымат катчысы Мелис Эржигитов Sputnik Кыргызстан агенттигине билдирди.

Белгилей кетсек, Башкы прокуратура Мамлекеттик каттоо кызматынын жетекчиси Тайырбек Сарпашевди Максим Бакиевдин ишенимдүү адамы Ульяна Пакка тиешелүү кыймылсыз мүлктү камактан чыгарууга буйрук берген деп айыптап, аны кызмат ордунан алуу боюнча өкмөт башчыга сунуш жөнөткөн. Прокуратура Сарпашевге Максим Бакиевдин жана анын жакындарынын мүлкүн конфискациялоо боюнча маселе элдин көңүл чордонунда экенин билип туруп, Бишкек мамлекеттик каттоо кызматына түз буйрук бергенин да баса белгилеген.

"Биз райондор аралык соттун чечимин аткардык. Ал жерде прокуратура "Мамлекеттик каттоо кызматы түздөн-түз кийлигишип, шаардык каттоо кызматына тапшырма берген" деп өзүнүн тили менен айтып жатат. Ал тапшырма эмес, күн сайын эле берилип турчу кат. Ал катта эч кандай тапшырма жок. Болгону "эмне үчүн соттун чечими аткарылбай жатат, ага кандай тоскоолдуктар бар" деген корутунду жазылган", — деди Эржигитов.

Ал ошондой эле Мамлекеттик каттоо кызматы соттун чечимин аткарып бүткөндө кийин прокуратура эки соттун чечимин алып келип, "силер туура эмес каттап коюптурсуңар" деп жатканына таң калып жатканын кошумчалады.

"2-ноябрда чыккан соттун чечими бизге эмне үчүн 28-декабрда келди деген суроо туулуп жатат", — деди маалымат катчы.

Эржигитов Мамлекеттик каттоо кызматы өзүнүн ишин так аткарганын, анын ишмердигинде эч кандай мыйзам бузуу болбогонун баса белгиледи.