БИШКЕК, 27-июл. — Sputnik. Премьер-министр Сооронбай Жээнбеков бизнес чөйрөсүнүн өкүлдөрү менен такай жолугушуп турууга даяр экенин айтып, тийиштүү мекеме жетекчилерине аталган жааттагы көйгөйлөрдү чечүүгө арналган жолугушууларды уюштуруп турууну тапшырды. Бул тууралуу өкмөттүн маалымат кызматы билдирди.
Өкмөт башчы өлкөнүн бизнес-чөйрө өкүлдөрү менен, тактап айтканда, ЖИА бизнес-ассоциациясынын, Эл аралык ишкерлер кеңешинин, Күнөсканалар ассоциациясынын, Улуттук бизнес ассоциациялар альянсынын жана Кичи ГЭСтер ассоциациясынын өкүлдөрү менен жолугушту.
Анда кичи жана орто ишканаларды өнүктүрүү, зергерлик, айыл чарба, туризм, курулуш жана транспорттук тармакты өнүктүрүү, мамлекеттик органдардын көзөмөлү жана мамлекеттик чек аралар аркылуу товарлардын өтүүсү тууралуу маселелер талкууланды.
Жээнбеков өкмөт өлкөнүн бизнес тармагынын өкүлдөрү менен ачык пикир алышууга жана кызматташууга даяр экенин айтты.
