БИШКЕК, 19-мар. — Sputnik. Премьер-министр Темир Сариев Россиянын өкмөт башчысы Дмитрий Медведевге Ростов-на-Дону аэпортунда кулап түшкөн учакка байланыштуу көңүл айтканын өкмөттүн маалымат кызматы билдирди.
19-мартта Бишкек убактысы боюнча 6.40тар чамасында Дубайдан Ростов-на Дону шаарына учуп келген Fly Dubai компаниясына таандык Boeing 737-800 учагы конуп жатып кулап, 55 жүргүнчү жана экипаждын жети мүчөсү каза болгон.
"Ростов-на-Донудагы жүргүнчү учагынын кыйрашына байланыштуу көптөгөн адамдардын курман болгондугу тууралуу кабарды терең кайгыруу менен кабыл алдым", — деп айтылат өкмөт башчынын көңүл айтуусунда.
Сариев КР өкмөтүнүн жана жеке өзүнүн атынан авиакырсыкта каза болгондордун жакындарына жана тууган-туушкандарына көңүл айтып коюуну өтүнгөн.
