Атамбаев: электр кубатына баа кантип аныкталаарын эл билгенге укуктуу

Жазылуу
Президент Атамбаев элдин электр кубатына баа кантип коюларын билбегендиги кээ бир атка минерлерге бул теманы жүгөндөп алганга жол бербей тургандыгын айтты.

БИШКЕК, 28-апр. — Sputnik. Кыргызстанда ар бир адам электр энергиясына баа кантип коюлаарын түшүнүшү үчүн тариф саясатын өзгөртүү керек деп билдирди президент Алмазбек Атамбаев Коргоо Кеңешинин отурумунда. 

Учурда мамлекеттик "Ала-Арча" резиденциясында Кыргызстандагы энергетика тармагындагы суроолор боюнча Коргоо кеңеши өтүп, ага өлкөнүн бийлигинин бардык бутактарынын өкүлдөрү катышууда.

Атамбаевдин айтымында, элдин электр энергиясына тарифтердин кантип коюлары жана анын эмнеге негизделери туурасында кабары болушу керек.

"Жөнөкөй тил менен айтканда, 1 кВт-саат кантип топтолоорун карапайым эл билиши зарыл, ал эми биз ага адилеттүү бааны коюп, элге беришибиз керек", — деп айтты ал.

Президент мындай болгондо гана кээ бир саясатчылардын билермандык кылып, ар кыл маалыматтарды айтып, өлкөдөгү абалды чайпалтуусуна аракет кылышына жол берилбей калаарын кошумчалады.

Мамлекет башчысы Коргоо кеңешинин мүчөлөрүнө тармактын өнүгүү боюнча узак мөөнөттүү стратегиясын аныктап, келечекте өлкөнүн энергетикалык коопсуздугун камсыз кылуу боюнча кардиналдуу чечимдерин кабыл алуусун сунуштады.

Жаңылыктар түрмөгү
0