Атасына топурак сала албай калган уулдун шору. Деградация Базаровдун көзү менен

Sputnik Кыргызстан агенттиги коомдогу курч маселелерди көргөзгөн кинофильмдеги кызыктуу ирмемдерди сунуштайт.

Белгилүү режиссер Геннадий Базаров "Приют для совершеннолетних" тасмасынын сценарийин өзү жазып, үч жылдай аракет кылып жүрүп, аны 1987-жылы көрүүчүлөргө сунуштаган. Эмгегинде союз мезгилиндеги аракечтик маселесине кайрылып, ичкиликтин азабынан жумушунан, үй-бүлөсүнөн айрылып, киши катарынан чыгып наркологиялык ооруканада жаткан адамдардын тагдырын наркологдун жумушу аркылуу чагылдырган. Каармандардын басымдуу бөлүгү жаштар болуп, арактын кесепетинен өз өмүрүнө кол салып көз жумган сүрөтчүнүн, ичкиликтен улам атасын акыркы сапарга узата албай калган уулдун жана акыл-эсинен айрылып калганга чейин ичкен жигиттин кайгылуу окуясы баяндалат.

Кинематографист өзүнүн фильминде коомдогу чоң көйгөйдүн кесепетин жашоодогу чыныгы окуялар менен ачып берген. Мисалы, автобуста отурган наркологиялык оорукананын бейтаптарын, ата-эненин арагынан улам ара төрөлгөн майып балдардын жашоо-турмушун көрсөткөн. Ошондой эле наркологдун ролун жараткан Советбек Жумадыловдун жумуштан үйгө келип алып, аркы дүйнөгө кетип жаткан жаштарды эстеп, түндө жалгыз отуруп алып көз жашын көлдөткөн ирмемдери бар.

Тасмада Эдилбек Чокубаев, Николай Марусич, Марианна Катаева, Айтурган Темирова, Гүлсара Ажыбекова, Мария Абакирова, Нуржуман Ихтымбаев, Марат Алышпаев, Борис Гитин, Димаш Ахимов, Сергей Николаев, Эмиль Борончиев роль жаратып, Манасбек Мусаев оператор, Актан Арым Кубат сүрөтчү-коюучулук милдетти аткарган. Фильм бир жылда Бишкек шаарында жана Сокулук районунда тартылып бүтүп, кийинки жылы бардык союздук республикаларда көрсөтүлгөн.

Режиссер кийин дагы коомдук маселелерге кайрылып, криминалдык мүнөздөгү "Айың", аракечтик, сойкулук, кылмыштуулукту баяндаган "Аномалия" фильмдерин жараткан.