Көчмөндөр оюндарына 59 күн калды. Бүтө элек жол, бөлүнбөй жаткан каражат

© Sputnik / Максим Богодвид / Медиабанкка өтүүЖол ремонт иштери. Архив
Жол ремонт иштери. Архив - Sputnik Кыргызстан
Жазылуу
Көчмөндөр оюндарына карата Чолпон-Атага кеткен жолдун 35 чакырымы бүтүшү керек. Бирок жол куруу боюнча адис убагында жетишүү мүмкүн эмес экенин билдирди.

БИШКЕК, 6-июл. — Sputnik. Айида Батырбекова. Дүйнөлүк көчмөндөр оюндарынын башталышына туура 59 күн калды. Ага даярдык көрүү үчүн 100 чакырымга созулган Балыкчы – Тамчы – Чолпон-Ата — Корумду унаа жолунун Чолпон-Ата шаарына чейинки 35 чакырымы убагында оңдолуп бүткөрүлүүсү керек. 

Боом капчыгайындагы жол. Архив - Sputnik Кыргызстан
Боом капчыгайында жол кайрадан жүз миңдерди чапчыйбы?
Финансы министрлигинин берген маалыматына караганда Балыкчы — Тамчы — Чолпон-Ата — Корумду унаа жолун курууга 2015-жылы 180 миллион сом бөлүнсө, быйылкы жылдын 1-июлуна карата 500 миллион каралган. Ошону менен жалпы каржылоо 680 миллион сомду түзгөн. 

Жогорку Кеңештин бюджет жана финансы комитетинин мүчөсү Зиядин Жамалдинов Sputnik Кыргызстан агенттигине Көчмөндөр оюндарына карата жолду бүткөрүү үчүн кошумча дагы бир миллиард сом бөлүү чечими чыкканын билдирди. 

"Бүткөрүлчү жолдун узундугу 100 чакырымды түзөт. Бирок анын баарын быйыл бүтүрүүгө мүмкүн эмес. Буга байланыштуу Көчмөндөр оюндарына карата Чолпон-Атага кеткен жолдун 35 чакырымын жасоо үчүн кошумча бир миллиард сом бөлүү сунушун парламент колдоп берген. Каражат мамлекеттик бюджеттен бөлүнгөн", — деп билдирди Жамалдинов.

Ал эми Финансы министрлигинин коомчулук менен байланышуу секторунун башчысы Гүлмира Түгөлбаева кошумча каражат бөлүү каралганы менен министрлик чечимди расмий түрдө ала элегин билдирди. 

"Жогорку Кеңештин профилдик комитети жолду бүткөрүүгө кошумча бир миллиард сом бөлүү чечимин чыгарганын маалымат каражаттарынан окудук. Бирок биздин ведомствого расмий чечим келе элек", — деп билдирди Түгөлбаева. 

Каржы маселеси биринчи көйгөй болсо, "Бишкекасфальт" муниципалдык ишканасынын жетекчиси Мирлан Амантуров 35 чакырым жолду 59 күндө бүткөрүү мүмкүн эмес экенин ырастады.

"Шаар ичинде 35 чакырым жолду 6-7 айда бүтүрүп келебиз. Кээде 2-3 жылга чейин созулуп кетет. Чолпон-Атага кеткен жолдун 35 чакырымын Көчмөндөр оюндарына чейин бүтүрүү мүмкүн эмес. Биринчиден курулушчуларда 15-20 миң тонналык эле материал бар экен. Эгер жалпы 300-400 миң тонна асфальт кетсе, ошол материалды эле даярдоого көп убакыт талап кылынат", — деди Амантуров. 

Ал билдиргендей жетишип калган күндө дагы жолдун сапаты өтө начар болуп калат. 

Жаа атуу. Архив - Sputnik Кыргызстан
Көчмөндөр оюну: ролик үчүн 600 миң сом сарпталган эмес
Мындан тышкары, Бостери айыл аймагынын Бактуу-Долоноту айылында Көчмөндөр оюндарына карата ипподром курулуп жатат. Финансы министрлигинин маалымат кызматы курулуш иштерин толук бүткөрүүгө 1 миллиард 234 миллион сом керектелерин айтып, учурда анын 988 миллиону бөлүнүп берилгенин тастыктады. Каржылоочу булак мамлекеттик бюджет болуп эсептелет. 

Жол менен ипподром куруудан сырткары уюштуруу иштерине дагы каражат керектелет. Мамлекеттик бюджеттин тартыштыгына байланыштуу Дүйнөлүк көчмөндөр оюнунун катчылыгы ишкер чөйрөнү демөөрчүлүк кылууга чакырган. Ал канчалык ишке ашкандыгы тууралуу катчылыктын жетекчиси Нурдин Султамбаев төмөнкүлөрдү билдирди. 

"Дөмөөрчүлөр табылды. Алардын бардыгы Көчмөндөр оюндарынын расмий билборддоруна жарыяланат. Андан чогулган каражат уюштуруу иштерине жумшалат", — деп билдирди Султамбаев.

Тамчы — Бактуу-Долоноту: жумушчулар кайтадан ишке чыгышты - Sputnik Кыргызстан
Тамчы — Бактуу-Долоноту: жумушчулар кайтадан ишке чыгышты
Катчылык жетекчиси канча сумма чогулганын айтуудан карманганы менен дөмөөрчүлөрдөн түшкөн каражат негизги каржылоочу булак болуп бере албай турганын айтып, каражаттын басымдуу бөлүгү мамлекеттик бюджеттен берилерин ырастады. 

Белгилей кетсек, Дүйнөлүк II көчмөндөр оюндары 3-8-сентябрь аралыгында Чолпон-Ата шаарында өткөрүлөт. 

Жаңылыктар түрмөгү
0