БИШКЕК, 9-сен. — Sputnik. Үч тоннадай мазуттун Кара-Балта дарыясына төгүлүшүнө күнөөлүү делген компанияга беш миңден 10 миң сомго чейин айып салынат. Бул тууралуу Мамлекеттик экологиялык техникалык инспекциянын Кара-Балта шаары, Жайыл, Москва, Понфилов райондору боюнча аймактык башкармалыгынын жетектөөчү адиси Жоомарт Байтереков билдирди.
Байтерековдун айтымында, мазут 625 чарчы метр жерге төгүлүп, дарыяга да куюлган.
"Бул дарыянын суусун үч айыл алып ичет. Суу тосмолорунда коркунучтуу заттар табылган жок. Азыр биз мунай азыктары төгүлгөн жерди жана сууну тазаладык", — деди Байтереков.
Эколог Эмил Шүкүровдун айтымында, бул авариянын кесепети олуттуу болушу мүмкүн.
"Бир литр мунай азыгы миллион литрдей сууну уулантат жана көпкө чейин кетпейт. Андыктан алар сууну ууландыра берет", — дейт эколог.
Шүкүров мындай авариялар жыл сайын катталып жатканын өкүнүү менен белгилеп, дарыяларда балык калбай калганын кошумчалады. Тилекке каршы, мунай азыктарын иштеткен компаниялар эч чара көрбөй келет.
