Эксперт: КРдин тарыхында Саляновадай күчтүү прокурор боло элек

© Пресс-служба президента КР / Султан ДосалиевПрезидент Алмазбек Атамбаев принял Генерального прокурора Аиду Салянову
Президент Алмазбек Атамбаев принял Генерального прокурора Аиду Салянову - Sputnik Кыргызстан
Жазылуу
Кыргызстандагы эксперттер Баш прокурор Аида Салянованын азырынча тактала элек отставкасы боюнча пикирлерин билдирди.

БИШКЕК, 20 янв — Sputnik. "Саляновадай иштеген прокурор Кыргызстандын тарыхында жок болгон", — деп эсептейт саясат таануучу Бакыт Бакетаев.

Мындан мурдараак Ак Үйдөгү булактар Аида Салянова отставкага кетүүгө арыз бергендигин билдирген. Бүгүн ЖКнын Адам укуктары, конституциялык мыйзамдуулук жана мамлекеттик түзүлүш боюнча комитети Баш прокурордун отставкага кетүү боюнча жазган арызын жактырды. 

"Салянова канча деген аткаминерлерге, бийликте тургандарга кылмыш ишин ачты. Андан кийин акыркы маалыматтар – анын күйөөсү туурасында болуп жатат. Кылмыш иши деп жатышат, аны күтө туруш керек. Дагы айта турган сөз коррупцияга каршы күрөшүүгө жалгыз Баш прокурордун алы жетпейт экен. Системалуу күрөшүүгө өтпөсөк, анын болгону болгон. Ал эми күйөөсү туурасында маалыматтар боюнча менин пикирим, презумпция деген бар, ошону күтө туралы. Ал эми Салянова боюнча мезгил көрсөтөт", — деди саясат таануучу Бакыт Бакетаев.

Марат Иманкулов УКМК төрагасынын мурдагы орун басары бул боюнча башкача пикирде. Анын айтымында, коррупцияга аралашкандарга кылмыш ишин козгоо – Башкы прокуратуранын милдети.

"Маалыматтарды жалпыга маалымдоо каражаттарынан угуп жатам. Алгач, эмгек өргүүсүнө чыкты, эс алып жатат, узакка эс алууга кетти деген маалыматтарды айтышты. Ар кайсы маалыматтардын арбын айтылып жаткандыгына караганда, бул жерде бир маселе бар экендигинин белгиси. Албетте, отпускага чыкканга толук укуктуу. Жашырбай эле, толук болгонун болгондой айтып коюшпайбы. Болбосо шектенүү жарала берет. Салянова коррупцияга аралашкан мамлекеттик кызматкерлердин, депутаттардын коррупциялык иштерин ачып, күчтүү кадам жасады деп жатышпайбы. Мен буга кошулбай, анткени бул ар бир прокурордун милдети", — деди Иманкулов. 

Шейшемби күнү Ак Үйдөгү булактар Аида Салянова отставкага кетүүгө расмий түрдө арыз берди деп билдиришкен. Ал эми анын кызматтан кетүүсү туурасында кептер 2014-жылдын аягында айтылып баштап, бирок, анын мамлекет башчысы четке каккан.

Жаңылыктар түрмөгү
0